Select Page

Sertifikashon orgániko aksesibel, e ta posibel?

Sertifikashon orgániko aksesibel, e ta posibel?

For di dia e inisiativa di e Koperativa Fresku i Orgániko (v)ITAL a start ku e pakete (v)ITAL ta usá e término orgániko òf biológiko pa e bèrduranan i frutanan ku (v)ITAL ta entregá via e pakete semanal.

Den Koperativa Fresku i Orgániko (v)ITAL nos tin un prinsipio básiko pa esaki, nos por bisa ku e kunukeronan no tin mag di usa pèstisidanan kímiko (refiriendo na sintétiko) ni tampoko fertilisantenan artifisial. Sinembargo nos ta hopi konsiente ku esaki ta solamente un kriterio mínimo pa proseso orgániko i ofisialmente nos agrikultornan no ta kumpliendo ku e normanan pa produkshon orgániko manera pa paisnan afiliá na Caricom sí ta konta.

Nos frutanan i bèrduranan tampoko no ta sertifiká. Semper nos a ser hopi habrí ku esaki. Sertifikashon orgániko ta hopi kostoso i niun di nos kunukeronan lo por paga esaki sin bai bankarota. Den e sentido aki por lo tantu nos ta den un sorto di impase. Nos ta deseá di logra oumentá e normanan di kalidat di nos produktonan pero nos no tin kòntròl riba kumplimentu di esaki. Eksperensianan den otro paisnan manera Brasil, por ehèmpel, ta mustra nos ku konsumidónan ta hunga un ròl krusial den establesé formanan di sertifikashon pagabel i di mehorashon di e kalidat orgániko.

Abo komo konsumidó ta benefisiá mas dor di elevá e normanan di kalidat asina e kalidat adekuá por wòrdu proporshoná. Kunukeronan tambe ta benefisiá di e normanan orgániko pasobra asin’aki nan por krea distinshon. E sistema asina yamá PGS, Participatory Guarantee System (un sistema di garantia partisipativo) ta involukrá otro agrikultornan i konsumidónan den kapasitashon i implementashon di normanan biológiko. E agrikultornan ku ta partisipá na un programa asin’aki ta risibí un sertifikado pasobra nan a drenta konsientemente den un proseso di kresementu, enseñansa i desaroyo ku otro agrikultornan i konsumidónan. Kunukeronan i konsumidónan ta bishitá negoshinan di otronan pa yuda otro mutuamente na mehorá e kalidat orgániko. No tin nesesidat di paga inspektornan kostoso for di den eksterior.

Nos lo apresiá si un grupo di abonadonan ta sinti nan yamá pa kolaborá ku kunukeronan na konfigurashon di un sistema PGS aki na Kòrsou. Nos tur tin benefisio na esaki.

Pa mas informashon por subi riba e link aki:
https://www.ifoam.bio/en/pgs-general-questions
Roland van Reenen 660-1456,
Gianne Balentien 663-3878

373 Bia mirá, 3 Bia mirá awe

Tokante e autor

Generic selectors
Exact matches only
Search in title
Search in content
Search in posts
Search in pages
Filter by Categories
Biba Salú
Kome Salú
Move Salú
Notisia
Notisia lokal
Pensa Salú

Inskripshon


Aviso