Select Page

E benefisio di yoga

E benefisio di yoga

Yoga ta realisashon di Dios. Ta e logro di unidat di e alma ku e Ser Supremo. Ta e revelashon den hende di su propio transendensia. Konosementu perfekto di esensia di e ser ta kulminashon di tur konosementu. E konosementu aki ta sabiduria.

Segun e Filosofia di Yoga, Dios ta unu. Kreashon ta sali di su Ser i tur alma ta parti integral di universo. E ta E Bida den tur loke ta eksistí, E Inteligensia di tur ser konsiente i E Plenitut di tur amor. E logro di inmortalidat, infinidat i bienaventuransa ta den dje.

Tur enseñansa i tur téknika di yoga tin e propósito di guia e hende pa logra Divinidat. Un bida di yoga ta un bida penetrá di Dios segun yoga. Primeramente ta nesesario iluminá kada aspekto di nos bida ku lus di Dios, saturá kada momentu ku amor, deboshon i adorashon.

E logro pa realisá Dios ta semper posibel denter di e poder spiritual di kada ser humano. Kada un di nos a ser kapasitá pa konosé, revelá i realisá Dios, pasobra nos ta dotá ku e kapasidat di mir’e denter di e lus puru di nos konsiensia, di pèrsibi’e denter di e iluminashon di nos birtut i di realis’é denter di e dibinidat di nos alma. E presensia di Dios denter di nos, ku nos por biba konstantemente bou di tur sirkunstansia, ta e prinsipio fundamental di yoga.

Etimológikamente e palabra yoga ta bin di un rais Sanskrit ku ta nifiká unidat òf identidat apsoluto. Por studi’é i praktik’é bou di su siguiente aspektonan.

Laya Yoga òf yoga di e mente

Den Laya Yoga e mente ta totalmente apsorbé den e pensamentu di Dios, na tal ekstremo ku tur su fakultat i funshonnan ta iluminá solamente pa lus di birtut di e Ser Supremo. Ta kaminda e mente ta identifiká su mes konstantemente ku e lus i atributonan di Dios te ku ta solamente e kualidatnan dibino ta iluminá, inspirá i guia tur potensia mental.

Mantra Yoga òf yoga di e palabra sagrado

Un mantra ta un palabra sagrado spesífiko ku tin kolorashon ku e bèrdat relashoná ku Dios i santidat. E palabra ta símbolo di un pensamentu ku na su turno ta proyektá un ideal. E mantra, ripití sin interupshon ta despertá i mantené e idea di Dios.

Jhana Yoga òf yoga di e Supra-konsiensia

Jhana Yoga ta e unifikashon di nos konsiensia ku konsiensia dibino. Konsiensia ta independiente di tur pensamentu i konsepto. Pensamentu i konseptonan ta, na manera di papia, e diferente olanan den e oséano di e konsiensia. Konsiensia ta infinito i puru. E ta kósmiko i apsoluto. E ta, primeramente, konsiensia di nos mes i di e Ser. Atrabes di unifikashon di nos konsiensia ku e konsiensia kósmiko nos ta realisá Dios.

Karma Yoga òf yoga di akshon

Akshon riba su mes, komo ekspreshon di e Ser, komo manifestashon di Dios atrabes di hende, komo homenahe na Dios den tur akto  diario, esei ta Karma Yoga. Un akshon sin deboshon na Dios i amor di e alma, ta únikamente vanidat. Den manifestashon di e atributonan di Dios atraves di nos servisio, nos alma ta permanesé den konstante union ku n’Eb.

Bhakti Yoga òf yoga di amor

Di tur nos sintimentu i emoshonnan amor ta esun di mas sublime. E ta e forsa dibino. E ta e poder di Dios den e alma humano, Su forsa kreador den nos. Den su perfekshon, amor ta deboshon apsoluto na Dios komo plenitut supremo. Den Bhakti Yoga, Dios ta Amor i e kaminda pa realisá Dios ta amor, únikamente amor. Amor ta krea e unidat spiritual, e unidat di alma.

Raja Yoga òf yoga di ekilibrio síkiko

Serenidat ta e trankilidat dinámiko di e alma. Ta un estado di kalma profundo den nos konsiensia. Ekilibrio ta proveé e serenidat nesesario pa enfoká tur nos poder i forsa riba Dios. Raja Yoga ta e método pa yega na ser unu ku Dios atrabes di serenidat.

Kriya Yoga òf yoga di e Ser

E Ser Supremo ta Dios. E ser individual ta alma di hende. E diferensia entre nan dos ta di grado no di kalidat. Atraves di Kriyab yoga e ser individual kada bes, mas i mas, ta bai desvelá e atributonan dibino den dje, tantu asina te ku e Ser Supremo ta yega na manifestá Su mes kompletamente den dje. Esaki nos ta yama outo-realisashon.

Hatha Yoga òf yoga di e kurpa

Ku Hatha Yoga nos ta yega na realisá e poder i beyesa dibino di nos organismo. Nos kurpa ta e instrumento pa realisá Dios i  manifestá e alma. E ta sostené pa e sustansia di Dios i ta funshoná den harmonia ku leinan di e espíritu. Hatha Yoga no ta pa desaroyá e físiko manera ta e kreensia komun. Ta harmonisashon di e organismo físiko i di e sistema nèrvioso ku e bèrdat i leinan di Dios.

Outor: Krishna Yogananda
Saká for di Kriya Yoga Magazine
Tradusí pa Diana Pinto

HATHA YOGA

Den e siguiente parti nos ta bai elaborá un poko mas riba e delaster yoga, esta, hatha yoga. Manera anteriormente bisá hatha yoga ta e parti di yoga ku ta dirigí su mes riba e aspekto físiko di yoga kual, atrabes di posturanan (asanas), finalmente tin e ophetivo di tur yoga, esta: evolushon integral di e ser humano.

Ku e práktika di hatha yoga sinembargo bo por alkansá tambe metanan konkreto den un tempu relativamente kòrtiku ku ta prepará e individuo pa e siguiente stap den su evolushon. E metanan konkreto ta riba terenonan físiko, mental i emoshonal.

Benefisionan físiko di Hatha Yoga

Hatha Yoga ta:

  • Fleksibilisá  e artikulashonnan
  • Aktivá  e sistemanan nèrvioso sentral i perifériko i e sistemanan simpátiko i parasimpátiko
  • Enrikesé kapasidat vital
  • Regulá e sistema endokrino
  • Stimulá sirkulashon

Benefisionan mental i emoshonal

E praktikante di e posturanan di hatha yoga (òf asanas) ta eksperensia  kietut i outonomia pa ku su medio ambiente. Esakinan, huntu ku e konsentrashon riba e ritmo respiratorio, ta yuda suprimí elementonan ku ta kousa konflikto interno. E resultado ta ekilibrio mental, serenidat i optimismo.

No tin limitashon di edat pa kuminsá ku e práktika di hatha yoga. Hatha yoga ta benefisiá tur hende, na kualke momentu i na tur edat. Pa optené mayor benefisio, sinembargo, no mester praktiká hatha yoga komo un lès di gemnastik mas. Den hatha yoga e individuo mester sinti deskanso, trankilidat i pas.

Algun postura klásiko di Hatha Yoga:

Sarvangasana

Sarvangasana ta spesialmente benefisioso pa normalisá tur desfunshon di e glándulanan di tiroide i paratiroide. E tiroide ta e glándula mas importante di e sistema endokrino. Den e postura aki e ta risibí masashi i ta ser irigá ku sanger na momentu ku preshon’é ku e kachete.
Mas aleu e ta strèch e parti di garganta i e parti ariba di lomba sèrvikal i e parti patras di e kolumna vertebral i ta aktivá sirkulashon den e region pélviko i e region apdominal.
Personanan ku tin un digestion slou tambe ta risibí gran benefisio. E postura aki ta yuda hende muhénan ku problemanan femenino. Personanan ku ta sufri di spatader ta optené deskanso pa e pianan.
E posishon invertí aki ta duna e kurason un deskanso ya ku sanger ta yega sin ku e tin di pòmp esaki manda ariba. Tur tehido di kara i e selebre ta haña mas sanger kual ta yuda e memoria miéntras e kútis ta mantené su freskura natural pa tempunan largu.

Bhujangasana

Bhujangasana ta fleksibilisá henter e kolumna vertebral i ta yuda koregí deformashon den esaki. E ta é postura indiká pa doló di lomba. E ta stimulá tur arteria, bena i fibranan muskular i nèrvioso. P’esei, entre otro, e ta mehorá memoria.
E ta oumentá kapasidat respiratorio i ta purifiká e laringe.
E ta tonifiká tur vísera apdominal i ta fortalesé múskulonan apdominal i múskulonan di e nèk. Pa hende muhé e ta ekselente ya ku e ta tonifiká ovarionan i e útero i ta aliviá gran kantidat di desfunshon di e órganonan aki.
E ta stimulá funshonamentu di nir i p’esei ta oumentá nan poder di eliminashon miéntras e ta purifiká e organismo.

Paschimotanasana

Paschimotanasana ta un postura di strèch ku ta tonifiká e region intestinal. E ta ser konsiderá e postura mas importante pa koregí konstipashon. E kontrakshon di e múskulonan apdominal ta aktivá sirkulashon di sanger.
E tin tambe benefisionan síkiko.

Savasana

Tur seshon di hatha yoga ta finalisá ku relahashon. E postura di relahashon yama savasana. Den savasana e individuo ta relahá su mes físikamente, mentalmente i spiritualmente. Pa por relahá e físiko primeramente mester opservá i bira konsiente di tenshonnan muskular den e kurpa pa despues, konsientemente, eliminá esakinan. Seguidamente ta pasa pa e relahashon mental kual e individuo por alkansá atrabes di opservashon di e ritmo di rosea. Di e relahashon mental e Yogi ta sigui ku e relahashon spiritual kaminda e ta retirá su mes for di e konsiensia físiko-mental i for di e konsiensia di e ego. E ta stòp di identifiká su mes ku kurpa i mente i identifiká su mes ku e Ser interior.

Ta rekomendabel pa, inisialmente, praktiká hatha yoga bou di guia di un instruktor ku eksperensia pa asina evitá kualke leshon di múskulo òf artikulashonnan (skarnirnan). Ta importante tambe pa nunka no hasi ningun postura ku ta surpasá kapasidat di e kurpa.
Asina hatha yoga lo ta di gran benefisio pa e praktikante.

Outor: Saká for di Kriya Yoga Magazine
Tradusí i adaptá pa Diana Pinto

863 Bia mirá, 7 Bia mirá awe

Generic selectors
Exact matches only
Search in title
Search in content
Search in posts
Search in pages
Filter by Categories
Biba Salú
Kome Salú
Move Salú
Notisia
Notisia lokal
Pensa Salú

Inskripshon