Select Page

Opta i skohe pa salú optimal

Opta i skohe pa salú optimal
Bo salú ta hopi importante i pa logra di optené i mantené un bon salú bo mester pensa riba kuater kos: biba salú, kome salú, move salú i pensa salú. Kada un di nan ta mes importante. Mester tin un balanse igual den tur kuater.

1. Biba salú

Ta hopi importante pa bo hasi kada dia e eskoho mas mihó pa bo mes. Bo kurpa ta diseñá di tal forma ku semper e ta buska pa bai bek den un estado di salú optimal. Bo kurpa tin e abilidat pa kura su mes. Naturalmente si bo a maltratá bo kurpa di un forma ku e no por regenerá mas, bo lo keda ku kehonan. P’esei duna bo kurpa e kosnan mas mihó komo nutrishon. Na momentu ku bo sinti algu straño òf diferente, bo tin ku sinta i wak presis kiko bo a kome, bebe, òf inhalá pasobra eseinan ta e kousa di lokual bo ta sinti. Hopi bia nos ta bisa ku e kurpa ta malu pasobra bo ta sinti algu ku no ta bon den bo kurpa. Esaki no ta kompletamente bèrdat, pero ta e manera kon a eduká hende pa e kere ku su kurpa ta ‘malu’. E bèrdat ta ku e kurpa no ta malu!

Laga mi splika: ora bo sinti bo stoma ta kima bo ta bisa ku ta e stoma ta malu pasobra e ta produsí hopi zür òf ásido; ora bo tin diarea dòkter ta bisa bo ku e tripa no ta bon; ora bo sinti ku kabes ta hasi doló, dòkter ta bisa bo ku ta doló di kabes òf migraine. Ora bo bai dòkter e ta bisa bo ku ta gastrítis bo tin i ta p’esei e stoma ta kima; bo tin diarea pasobra bo tripa ta suak; bo tin doló di kabes pasobra bo ta sufri di migraine. Kada malesa tin su nòmber i nos ta aseptá esei tambe pasobra ora nos sa ku ta e stoma, tripa òf kabes nos ta ferwagt di dòkter ku e ta duna un remedi pa e stoma, tripa òf kabes i ora e remedi supuestamente traha bon bo ta ferwagt ku e ta baha e zür di stoma, e ta stòp e diarea, i ku e ta stòp e doló di kabes. Esei ta e mentira ku nos a aseptá i a kere semper, …. pero e bèrdat ta otro.

Tur reakshon di e kurpa (den e ehèmpel ku mi a usa: stoma, tripa i kabes) ta algu normal i bon. Na momentu ku bo hasi (kome, bebe òf inhalá) algu robes bo órganonan mester mustra bo ku e kos ku bo a hasi no ta bon pa bo kurpa. Pues ora bo kome un kos ku no ta bon pa bo stoma, bo stoma MESTER mustra bo ku bo ta hasiendo algu robes òf fout; bo stoma ta bai produsí mas ásido pa deshasí di e kos malu ku bo a kome.

 

Ora bo kome algu ku no ta bon bo tripa MESTER saka e venenu ei anto un di maneranan pa hasi esaki ta dor di produsí diarea. Di e forma ei bo kurpa por deshasí di e produkto(nan) ku bo a kome i ku a afektá e tripa. Mesun kos ta konta pa doló di kabes. Bo kabes ta funshoná manera un bèl di alarma. Ora algu ku bo a kome òf bebe ku no ta bon pa bo kurpa, bo MESTER haña doló di kabes; esei ta e forma ku e órgano ta laga bo sa ku bo a hasi un fout. Pues ora bo tin doló di stoma, diarea òf doló di kabes (òf kualkier otro ‘problema’ den e kurpa) esei NO ta algu malu pero ta algu bon, pasobra bo kurpa ta reakshonando normal.

Eliminá e produkto ku ta kousa e daño

Ora bo bisa ku ta e stoma, e tripa, e kabes anto bo ta ferwagt tambe ku dòkter lo duna bo remedi pa trata e stoma, tripa òf kabes…. pero ora bo bisa ku bo a kome algu malu i ku esei a afektá bo stoma, tripa òf kabes….. e ora ei pa bo kura bo tin ku eliminá e produkto ku ta kousa e daño.

Skuchando e kurpa

Ora bo kambia e pensamentu ei bo por biba un bida salú pasobra kontinuamente bo ta skuchando e kurpa i bo ta komprondé kiko e kurpa ta bisando ora bo sinti algu. Nunka mas bo ta bisa “e kurpa ta malu” pero bo ta bisa “AMI a hasi daño na e kurpa i awor mi ta kontentu ku mi tin e doló aki pasobra mi a bira mas konsiente.

 

2. Kome salú

Kada kos ku bo kome i bebe mester duna nutrishon na bo sèlnan den bo kurpa. Kada órgano, kada struktura, kada funshon den bo kurpa ta hasi uso di e nutriente nan ku pa medio di bo alimentashon ta drenta bo kurpa.

Produkto ku por kousa malesa

Tur kuminda mester tin un sierto kantidat di karbohydrato (suku), proteina, vèt, vitamina, mineral, pa e kurpa por desaroyá riba un manera salú. Esei ke men tambe ku si bo no kome produktonan salú bo kurpa no por desaroyá den un forma optimal. Esei ta un kousa grandi pa malesa desaroyá. Tin hopi produkto ku por kousa malesa. Tambe produktonan ku ta parse saludabel i di kual komersio a pretendé pa hopi tempu kaba ku nan ta bon pa salú ta parse di ta un mentira.

E mihó kos ku kada persona por hasi ta kuminsá lesa i informá bo mes (via di entre otro Internèt) kiko tur e produktonan ta ku ta pone den bo nutrishon. Tur esakinan ta kai bou di e terminologia ‘aditivo’. Lo ta bon pa bo lesa tokante e aditivonan i kada bes komprondé kiko e ta hasi den bo kurpa i kua malesa(nan) e ta kousa. Hasi e kambio i kura bo mes di kada malesa. No sinta warda te ora un malesa presentá su mes pasobra e ora ei ta lat kaba. Purba di evitá di usa produkto kímiko, sintétiko òf produktonan artifisial. Den e pakete aki lo mi trata kada bes un kos ku ta hasi bo kurpa daño i kousa malesa. Di e forma ei bo por prevení malesa. I manera bo sa kaba: prevení ta mihó ku kura.

 

3. Move salú

E kurpa humano mester di moveshon adekuá pa mantené diferente funshon di e kurpa optimal. Dor di moveshon bo por mantené bo kurason, pulmon, sirkulashon salú. Naturalmente tin hopi otro aspekto ku ta hunga un ròl pa tene un órgano òf funshon salú i optimal.

Moveshon ta un parti chikitu pero si hopi importante. Moveshon no ke men ku bo mester di bai djòin un gym òf ku bo mester bai hasi deporte. Moveshon ta diferente pa kada persona. Pa un persona esei ke men ku e ta kore baiskel un ora pa dia i pa un otro persona esei ke men ku e ta hasi yoga. Moveshon no tin mester di kosta hopi. Bo por kuminsá kana den bo bario òf bai landa algun bia pa siman. Kada bes si ku bo bai hasi moveshon bo mester pèrkurá ku bo ta hasié mas mihó òf mas intensivo kompará ku e último bia. Dor ku bo ta sòru pa kada bes bo hasié mas intensivo bo ta drecha bo kondishon físiko. Kuminsá ku un trayekto (por ehèmpel kana den algun kaya den bo bario) den un sierto ratu. Nota e ora di salida i e ora di yega bek na kas òf for di e punta di salida. Kuminsá ku un trayekto di un mei ora. Kada bia bo kana bo ta trata pa yega 30 sekònde mas tempran na final. Ora bo ripara ku bo ta kanando e trayekto den 20 minüt pa por hasi e trayekto mas largu dor di agregá mas kaya den e trayekto. Keda mantené e ritmo òf velosidat meskos si. Bo por oumentá e tempu tambe dor di hasi e trayekto mas largu. No baha bo spit; si bo topa un kolega, amigu/a òf famia zuai bo man di leu i sigui kana. Probablemente e tambe ta riba mes un skèdjul i lo no preokupá ku bo. Ku landamentu tambe bo por usa mes un táktika. Bai move pasobra e ta bon pa bo kurpa!

4. Pensa salú

Hopi bia e pensamentu ta kousa problema i malesa den bo kurpa. Hasi bo bida mas fásil i kambia bo manera di pensa, òf bo manera di wak suseso den bo bida. Laga kosnan òf susesonan ku a pasa kaba ta un lès pa bo pero no un peso den bo bida. Tin bia algu ta pasa i e suseso ta parse hopi pisa i fèrfelu e momento ei. Despues ku algun ora òf dia a pasa bo ta wak e suseso ku otro wowo i bo ta puntra bo mes dikon bo a preokupá òf rabia asina tantu.

Siña di pordoná i lo bo ripara ku bo ta libra bo mes di hopi sintimentu negativo. Hopi bia nos ta tene algu na pechu i karga e rabia, odio, vengansa òf fèdrit den nos kurason. Esaki ta kousa malesa ku hopi bia bo no ta relatá ku e suseso ku bo no a laga los. Un hende a hasi bu malu? Òf mihó bisá: “Abo a permití un hende pa hasi bo daño?” ….pordoná i laga los! Pordoná no ke men ku bo mester kana rònt manera un santu anto bisa ku bo ta pordoná. Ora bo pordoná un hende bo por hasi esei den bo kurason so òf bo por ta un kaminda bo so, kantu di laman, òf riba un seru; einan bo por bisa trankil òf te asta grita: “tal i tal persona mi ta pordoná bo; mi ta laga bu los i mi ta deseá bo tur kos bon den bo bida.
Mi no ta bai karga bu mas ku tantu sentimentunan negativo den mi bida, pero mi ta laga bu los. Mi ta laga bu los pasobra bo tin e derechi di ta liber; bo tin e derechi di biba bo bida manera bo ke”. Purba di hasi esaki un bia i bo lo ripara kuantu kos ta kambia den bo kurpa i bida. Probablemente e persona ku bo a pordoná lo sinti esei tambe i na su turno e tambe lo pordoná bo…. pasobra mayoria bia ta tur dos hende tin mes un tantu kulpa den un suseso ku aparentemente a bai fout.

 

 978 Bia mirá,  3 Bia mirá awe

Tokante e autor

Inskripshon


Aviso

Skohe un idioma / kies een taal